PINCHAR PARA VER O VÍDEO DO ACTO

1º Premio

Ciencias Básicas

Verónica Bolón Canedo

Profesora da Universidade da Coruña, desenvolve a súa actividade no Laboratorio de I+D en Intelixencia Artificial do CITIC -Centro de Investigación en Tecnoloxías da Información e as Comunicacións-. O seu traballo céntrase no deseño de sistemas de intelixencia artificial eficientes, capaces de equilibrar rendemento, custo computacional e impacto ambiental. É pioneira en situar a sustentabilidade como eixe central do deseño algorítmico.

Accésit

Ciencias Básicas

Manuel Souto Salom

Investigador do Centro Singular de Investigación en Química Biolóxica e Materiais Moleculares (CiQUS) da Universidade de Santiago. Traballa no desenvolvemento de materiais máis sostibles con aplicacións en almacenamento enerxético. Na actualidade está enfocado no desenvolvemento de baterías máis eficientes e sostibles, baseadas en eléctrodos orgánicos, fronte ás baterías de litio convencionais, que usan elementos críticos como o cobalto.

Accésit

Ciencias Básicas

Ismael González García

Investigador do Centro Singular de Investigación en Medicina Molecular e Enfermidades Crónicas (CiMUS) da USC. Afonda nos mecanismos neuroendocrinos que controlan o metabolismo. Nesta liña, descubriu que os estróxenos actúan no hipotálamo para incrementar a temperatura corporal e xerar saciedade. En relación á regulación hipotalámica do peso corporal, os seus traballos supuxeron un notable avance no coñecemento dos mecanismos fisiopatolóxicos da obesidade.

1º Premio

Ciencias Técnicas

Laura Castro Santos

Investigadora da Universidade da Coruña, desenvolve o seu labor no Centro de Investigación en Tecnoloxías Navais e Industriais (CITENI) de Ferrol. A súa traxectoria céntrase no estudo técnico-económico das enerxías renovables mariñas: enerxía eólica mariña, enerxía undimotriz, sistemas híbridos de enerxía mariña e enerxía solar mariña. É a única catedrática na área de Construcións Navais en Galicia e a máis nova de toda España.

Accésit

Ciencias Técnicas

Lucía Díaz Vilariño

É profesora do Departamento de Deseño na Enxeñaría da Universidade de Vigo. Aborda a dixitalización da contorna construída para crear espazos máis seguros, intelixentes e sostibles. Tamén analiza o espazo urbano co obxectivo de comprender a súa influencia sobre o ser humano, de interese, por exemplo, para mellorar a accesibilidade ou facilitar a vida de persoas con diversidade funcional. Procura o mantemento intelixente de infraestruturas e a aplicación da circularidade e a sustentabilidade na construción.

1º Premio

Ciencias Sociais

María Barreiro Gen

Profesora da Universidade da Coruña e investigadora do centro de investigación interuniversitario ECOBAS. Céntrase na busca busca de mecanismos que axuden ás organizacións a ser máis sustentables, económica, ambiental e socialmente. Participou no proxecto europeo “ToNoWaste”, no que colaborou con 21 universidades e varias institucións de 7 países, co obxectivo de reducir o desperdicio de alimentos. É coordinadora do Green Campus da facultade de Economía e Empresa da UDC.

Accésit

Ciencias Sociais

Rubén Lado Sestayo

Profesor de Economía Financeira e Contabilidade da Universidade de Santiago. Ao longo da súa carreira desenvolveu dúas grandes liñas de investigación: o estudo do efecto da localización empresarial sobre as variables económico-financeiras, con especial atención ao sector turístico-hoteleiro español; e a xestión de riscos empresariais nun contexto de crecente dixitalización e transición enerxética. É secretario do Centro de Estudos Turísticos (CETUR) da USC e investigador de ECOBAS.